Белгілі қаламгер, драматург, қоғам қайраткері Медеу Сәрсеке 85 жасқа толды

Сәрсеке Медеу Сапаұлы Шығыс Қазақстан облысы Абралы ауданының Қайнар ауылында 1936 жылы 2 қаңтарда дүниеге келген. Орта мектепті алтын медальмен 1953 жылы бітіріп, Алматы қаласындағы Кен-Металлургия институтына инженер-металлург мамандығы бойынша оқуға түседі.
Ол студент кезінен ғылыми-фантастикамен әуестеніп, фантастикалық жанрдағы жарық көрген “Көрінбестің көлеңкесі”, “Жетінші толқын”, “От пен атом” эсселері жасөспірімдердің қызығып оқитын таңдаулы шығармалары болып табылады.

Оқуын тәмамдағаннан кейін біраз уақыт «Лениншіл жас» газетінде әдеби қызметкер, бөлім меңгерушісі болып еңбек етеді. 1959-64 жылдары Семей цемент зауытында шебер, зауыт диспетчері, техника бөлімінің аға инженері міндетін атқарған. 1964-1965 жылдары «Социалистік Қазақстан» газетінің Шығыс Қазақстан облысындағы меншікті тілшісі. 1965-1997 жылдары жазушылар Одағының Ертіс өңірі бөлімшесінің хатшысы қызметін атқарған. Медеу Сапаұлы 1962 жылдан бері  Қазақстанның жазушылар Одағының мүшесі болып табылады.

1970 ж. «Еңбектегі ерлігі үшін» медалімен, 2001 ж. «Құрмет» орденімен марапатталды. Сонымен қатар М.Сәрсеке Семей қаласы мен Абралы ауданының «Құрметті азаматы», Шәкәрім атындағы Семей мемлекеттік университетінің «Құрметті профессоры», «Құрметті кенші» және ҚР Геология комитетінің «Құрметті кен іздеушісі».
Жазушының қаламынан 43 кітап қазақ тілінде, 20 кітап орыс тілінде жарық көрді. Сонымен қатар қаламгердің сексен жылдық мерейтой қарсаңында  «Семей қасіреті» атты кітабі қалың оқырманға жол тартты.
Сәрсеке Медеу Сапаұлының қоры Қазіргі заман тарихын құжаттандыру орталығында сақталған жеке адамдар туралы жинақталған құжаттардың аса бағалы, құнды, қызықты,  мағыналы құжаттардың ең бірегейі. Медеу Сәрсекенің құжаты өз қолымен Қазіргі заман тарихын құжаттандыру орталығына мемлекеттік сақтауға 2001 жылы тапсырылды. Құжаттарға алғашқы рет 985-қор нөмірі берілді. Оған 1957-2001 жылдарды қамтитын №1-ші тізімдеме жасалды. Тізімдемеге 92 сақтау бірлігі енгізілген. Жазушы қазіргі  уақытқа дейін жеке қорын әлі де  толықтырып келеді. М.Сәрсекенің жеке қорынан алынған құжаттар негізінде  ҚЗТҚО – да көрме ұйымдастырылды. Қазіргі уақытта ҚЗТҚО Медеу Сәрсекемен тығыз байланыста жұмыс атқарады.